Stoð er sérhæft fyrirtæki á heilbrigðissviði fyrir öll sem þurfa stuðning við daglegar athafnir, þannig að þau geti tekið fullan þátt í samfélaginu og notið almennra lífsgæða. 

Hjá Stoð má finna heildstæðar lausnir sem taka mið af þörfum viðkomandi einstaklings. Fagmennska og þverfagleg samvinna, bæði innan Stoðar sem við heilbrigðisstarfsfólk utanhúss, er rótin þess að nýta þverfaglega þekkingu til að mæta þörfum viðskiptavina okkar.  

Saga Stoðar nær aftur til ársins 1982 og hefur kjarni þess frá upphafi verið sérhæfð stoðtækjasmíði, þar á meðal sérsmíði á spelkum, gervilimum og bæklunarskóm. 

Stoð er leiðandi í sölu hjólastóla og ráðgjöf þeim tengdum, flytur inn og sérpantar bæði hand- og rafmagnsknúna hjólastóla frá helstu framleiðendum á þessu sviði.  Þá hefur Stoð umtalsverða sérhæfingu í gerð sérmóta sem nauðsynleg eru fyrir marga hjólastólanotendur.  

Við bjóðum enn fremur fjölbreyttar lausnir fyrir þau sem þurfa stuðning til gangs, hjálpar- og öryggisbúnað tengdan bað- og salernisaðstöðu, sem og smáhjálpartæki ýmiskonar sem nýtast við athafnir daglegs lífs. 

Stoð sinnir í vaxandi mæli sérhæfðri ráðgjöf varðandi ýmiskonar aðstæður, má þar nefna ráðgjöf vegna þrýstingsmeðferða tengdum bólgum og bjúg, göngugreiningu, þjónustu vegna kæfisvefnsvéla, og ráðgjöf varðandi gervibrjóst og fatnað þeim tengdum.